ជោគវាសនា​សម្រាប់​អ្នក​កើត​ឆ្នាំ​កុរ តាម​ខែ​កំណើត

  • 2019-04-08 2:36:02 PM
  • ចំនួនមើល 1414 ដង

ឆ្នាំ​កុរ​ ជា​ឆ្នាំ​ទីដប់​ពីរ ក្នុង​ចំណោម​ឆ្នាំ​កំណើត​ចិន​ទាំង​១២ ហើយ​តំណាង​ដោយ​សត្វ​ជ្រូក។ អ្នក​ដែល​មាន​ឆ្នាំកុរ​គឺ​ជា​អ្នក​កើត​នៅ​ក្នុង​ឆ្នាំ 1923, 1935, 1947, 1959, 1971, 1983, 1995, 2007, 2019…។

Related image

ក្នុង​គំនិត​របស់​មនុស្ស​ភាគ​ច្រើន សត្វជ្រូក​គឺ​ជា​សត្វ​ដែល​ល្ងង់​ខ្លៅ ​ខ្ជិល​ច្រអូស ចូល​ចិត្ត​ដេកស៊ី​ឥត​ប្រយោជន៍​ច្រើន។ ហេតុ​នេះ​ហើយ​វា​ជា​ឆ្នាំ​ដែល​តំណាង​អោយ​ភាព ​ខ្ជិល​ច្រអូស និង ភាព​មិន​សូវ​វាងវៃ ទោះ​បី​ជា​បែប​ណា​ បើ​និយាយ​ពី​ចំនុច​វិជ្ជមាន​វិញ​នោះ វា​តំណាង​អោយ​អាកប្បកិរិយា​សមរម្យ ហើយ​និង​មិន​ចូល​ចិត្ត​កកូរកកាយ ឬ​ធ្វើ​បាន​អ្នក​ដទៃ​ដូច​គ្នា។ សម្រាប់​ជនជាតិ​ចិន​វិញ ភាព​ធាត់​នេះ គឺ​តំណាង​អោយ​ភាព​មាន​បាន ហើយ​និង​ទ្រព្យ​សម្បត្តិ​។ ខែ​កំណើត​ដែល​ល្អ​បំផុត​សម្រាប់​បុគ្គល​ដែល​កើត​នៅ​ក្នុង​ឆ្នាំ​កុរ​នេះ គឺ​ខែមករា កុម្ភៈ មេសា កញ្ញា និង​ខែ​វិច្ឆិកា។

ខាង​ក្រោម​នេះ គឺ​ជា​ជោគ​វាសនា​របស់​បុគ្គល​ដែល​កើត​នៅ​ក្នុង​ឆ្នាំ​កុរ​នេះ តាម​ខែ​កំណើត​នីមួយៗ៖

១) ខែ​មករា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ គឺ​ជា​មនុស្ស​ដែល​មាន​អំណោយ​ទាន និង​មាន​សំណាង​ល្អ។ ពួក​គេ​អាច​ទទួល​បាន​ជំនួយ​ពី សាច់ញាតិ ហើយ​និង​អ្នក​ដទៃ ដែល​អាច​ជួយ​អោយ​អាជីព​របស់​ពួក​គេ​រីកចម្រើន​យ៉ាង​ឆាប់​រហ័ស ហើយ​និង​រលូន​ថែម​ទៀតផ​ង។ ពួក​គេ​គឺ​ជា​មនុស្ស​ដែល​ឆ្លាត មាន​ចំនេះដឹង​ខ្ពង់ខ្ពស់ និង​ស្មោះត្រង់ ហើយ​នឹង​មាន​ជីវិត​ដែល​ពោរពេញ​ដោយ​សុភមង្គល និង​ភាព​រុងរឿង។

២) ខែ​កុម្ភៈ

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ គឺ​ជា​មនុស្ស​ដែល​មាន​ទេពកោសល្យ​ខ្ពស់​បំផុត។ ប្រសិន​បើ​ជា​ធ្វើការ​ស្រាវជ្រាវ​អ្វី​មួយ ពួក​គេ​នឹង​ទទួល​បាន​ជោគជ័យ ហើយ​និង​កេរ្តិ៍​ឈ្មោះ​ល្បី​រន្ទឺរ ហើយ​បើ​សិន​ជា​ធ្វើ​ពាណិជ្ជកម្ម​វិញ ពួក​គេ​អាច​នឹង​ទទួល​បាន​នូវ​ទ្រព្យ​សម្បត្តិ​ដ៏​មហាសាល ហើយ​ថែម​ទាំង​ទទួល​បាន​នូវ​ការ​គោរព​ពី​អ្នក​ដទៃ​ច្រើន​ទៀត​ផង។

ពួក​គេ​ជា​មនុស្ស​ដែល​មាន​សុខភាព​ល្អ ស្វាហាប់ ចិត្តល្អ និង​ពេញ​ដោយ​សំណាង​ល្អ​ក្នុង​មួយ​ជីវិត។

៣) ខែ​មីនា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ ជា​មនុស្ស​ដែល​អាច​រស់​នៅ​ប្រកប​ដោយ​សុភមង្គល ក្រោយ​ពេល​ដែល​ពួក​គេ​ឆ្លង​កាត់​ឧបសគ្គ​ លំបាកៗ​ជា​ច្រើន។ ចំពោះ​អត្តចរិត​វិញ មនុស្ស​ក្រុម​នេះ​ជា​មនុស្ស​ដែល​ឆ្លាត មាន​ជំនឿចិត្ត ស្វាហាប់ មាន​សុខភាព​ល្អ មាន​ចំនេះ​ដឹង​ខ្ពង់ខ្ពស់ និង​មាន​គោលដៅ​ក្នុង​ជីវិត​ធំ។ ទោះ​បី​ជា​បែប​ណា ដោយ​សារ​តែ​មិន​ទទួល​បាន​កេរ្ដិ៍​មរតក​ជា​ដុំ​កំភួន​ ហើយ​នឹង​ខ្វះ​ជំនួយ​ពី​សាច់​ញាតិ​ ពួក​គេ​ត្រឹម​អាច​ពឹងពាក់​លើ​សមត្ថភាព​របស់​ខ្លួន​តែ​ប៉ុណ្ណោះ ដើម្បី​ទទួល​បាន​នូវ​ភាព​ជោគជ័យ​ក្នុង​អាជីព និង​ការងារ។

៤) ខែ​មេសា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ ជា​មនុស្ស​ដែល​នឹង​រស់​នៅ​ក្នុង​ជីវិត​ដ៏​រុងរឿង មាន​ទ្រព្យ​សម្បត្តិ​ហូរហៀរ សុវត្ថិភាព និង​សុភមង្គល។ ពួក​គេ​គឺ​ជា​មនុស្ស​ដែល​ឈ្លាសវៃ ស្មោះត្រង់ មាន​ទេពកោសល្យ ហើយ​មាន​គោលដៅ​ធំ​នៅ​ក្នុង​ជីវិត ហើយ​ពួក​គេ​ថែម​ទាំង​អាច​សម្រេច​វា​បាន​ថែម​ទៀត​ផង។ ប៉ុន្តែ​ទោះ​បី​ជា​បែប​ណា ពេល​ខ្លះ​គោលដៅ​របស់​ពួក​គេ គឺ​ហាក់​ធំ​ខ្លាំង​ពេក ហើយ​សឹង​តែ​មិន​អាច​សម្រេច​ទៅ​រួច​ផង​ដែរ ដូច្នេះ​បើ​សិន​ជា​ពួក​គេ​មិន​ពិនិត្យ​អោយ​បាន​ល្អិតល្អន់​ជាមុន​ទេ នោះ​គោលដៅ​នោះ​នឹង​មិន​អាច​សម្រេច​ទៅ​រួច​ទេ។

៥) ខែឧសភា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ នឹង​ត្រូវ​រស់​នៅ​ក្នុង​ជីវភាព​ដែល​លំបាក នៅវ័យ​ក្មេង ហើយ​និង​វ័យ​កណ្ដាល ដើម្បី​ប្រឹងប្រែង​ពង្រឹង​គ្រឹះ​ការងារ​របស់​ខ្លួន។ ប៉ុន្តែ​នៅ​ពេល​ឈាន​ដល់​មជ្ឈិមវ័យ​ទៅ ការ​ងារ​របស់​ពួក​គេ​នឹង​ហុច​ផ្លែ​ផ្កា​ត្រលប់​មក​វិញ ហើយ​នឹង​ទទួល​បាន​នូវ​ការ​គោរព និង​ការ​កោត​សរសើរ​ពី​អ្នក​ដទៃ​ថែម​ទៀត​ផង។

មនុស្ស​ក្រុម​នេះ​ច្រើន​ជា​មនុស្ស​ដែល​ទន់​ខ្សោយ និង​ជា​មនុស្ស​ដែល​អភិរក្ស​និយម​ខ្លាំង ហើយ​ខ្សោយ​ផ្នែក​គំនិត​ច្នៃ​ប្រឌិត ហេតុ​ដូច​នេះ​ហើយ​ទើប​ឱកាស​ល្អៗ​ជាច្រើន ត្រូវ​របូត​ផុត​ពី​ដៃ​។ ប៉ុន្តែ​ពួក​គេ​ជា​មនុស្ស​ដែល​មាន​ទេពកោសល្យ​ផ្នែក​សិល្បៈ ហើយ​អាច​ទទួល​បាន​ជោគជ័យ​ល្អ​ប្រសើរ ទាក់​ទង​នឹង​វិស័យ​នេះផង​ដែរ។

៦) ខែមិថុនា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ គឺ​ជា​មនុស្ស​ដែល​ឈ្លាសវៃ​ជាទី​បំផុត។ ប្រសិន​បើ​ពួក​គេ​ប្រឹងប្រែង​ធ្វើ​កិច្ចការ​របស់​ខ្លួន​នោះ ពួក​គេ​អាច​ទទួល​បាន​ភាព​ជោគជ័យ​យ៉ាង​ធំធេង ទាំង​ផ្នែក​កិច្ចការ​ងារ​រដ្ឋ ពាណិជ្ជកម្ម ហើយ​និង​ផ្នែក​សិល្បៈ។ ប៉ុន្តែ​ទោះ​បី​ជា​បែប​ណា ប្រសិន​បើ​ពួក​គេ​គិត​តែ​ពី​រឿង​សប្បាយ ហើយ​មិន​ព្រម​កំណត់​គោលដៅ​សម្រាប់​ខ្លួន​ឯង​អោយ​បាន​ច្បាស់​លាស់​ទេ នោះ​ជីវិត​របស់​ពួក​គេ​នឹង​មិន​អាច​ទទួល​បាន​ជោគជ័យ​ឡើយ។

៧) ខែកក្កដា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ ជា​មនុស្ស​ដែល​នឹង​រស់នៅ​ក្នុង​ភាព​សម្បូរសប្បាយ ហើយ​និង​សុភមង្គល។ ដោយ​សារ​មាន​ជំនួយ​ពី​ឪពុកម្ដាយ ហើយ​និង​អ្នក​ដទៃ ពួក​គេ​អាច​មាន​ជីវិត​ការងារ​ដ៏​មាន​ជោគជ័យ។ ទោះ​បី​ជា​បែប​ណា មនុស្ស​ក្រុម​នេះ​ច្រើន​ឆាប់​ខឹង ឆេវឆាវ និង​ជា​មនុស្ស​ដែល​ផ្ដាច់​ការ។ ប្រសិន​បើ​ពួក​គេ​មិន​ព្យាយាម​កែ​អត្តចរិត​មិន​ល្អ​នេះ​ចេញ​ទេ នោះ​ពួក​គេ​ក៏​មិន​អាច​ទទួល​បាន​នូវ​ភាព​ជោគជ័យ​ដូច​គ្នា​ដែរ។

៨) ខែ​សីហា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ នឹង​មាន​ជីវិត​រស់​នៅ​ដែល​លំបាក នៅ​វ័យ​ក្មេង ប៉ុន្តែ​ពួក​គេ​មាន​ឱកាស​ល្អ​ច្រើន ក្នុង​ការ​ទទួល​បាន​ជោគជ័យ និង​ក្លាយ​ជា​មនុស្ស​ល្បីល្បាញ​ នៅ​ពេល​ដែល​ពួក​គេ​ឈាន​ចូល​វ័យ​កណ្ដាល ហើយ​នឹង​រស់​នៅ​ក្នុង​ជីវិត​ដែល​រុងរឿង និង​មាន​ទ្រព្យសម្បត្តិ​ស្ដុកស្ដម។ ពួក​គេ​គឺ​ជា​មនុស្ស​ដែល​ឆ្លាត ស្វាហាប់ ហើយ​និង​ជា​មនុស្ស​ដែល​មាន​ទស្សនវិស័យ​វែង​ឆ្ងាយ​ ពិសេស​លើស​មនុស្ស​ដទៃ។

៩) ខែ​កញ្ញា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ គឺ​ជា​មនុស្ស​ដែល​មាន​រូប​ឆោម​លោម​ពណ៌ ស្រស់ស្អាត ហើយ​និង​ជា​មនុស្ស​ដែល​ពូកែ​ចូល​ចុះ​ក្នុង​សង្គម​បំផុត។ ទោះ​បី​ជា​ពួក​គេ​មិន​សូវ​ជា​ប្រឹងប្រែង​ធ្វើ​ការ​ងារ​ប៉ុន្មាន ក៏​ពួក​គេ​នៅ​តែ​អាច​រស់​នៅ​ក្នុង​ភាព​សម្បូរសប្បាយ និង​គ្មាន​ទុក្ខកង្វល់។ ទោះ​បី​ជា​បែប​ណា ពួក​គេ​ត្រូវ​ឧស្សាហ៍​ហាត់​ប្រាណ​អោយ​បាន​ជា​ប្រចាំ ពីព្រោះ​បើ​មិន​អញ្ចឹង​ទេ​ពួក​គេ​នឹង​កើត​ជំងឺ​លើស​ទំងន់​ធ្ងន់​ធ្ងរ ដែល​អាច​ប៉ះពាល់​ដល់​សុខភាព​យ៉ាង​ខ្លាំង។

១០) ខែ​តុលា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ ច្រើន​កើត​ក្នុង​ក្រុមគ្រួសារ​ទីទ័ល​ក្រ ហើយ​ត្រូវ​ពឹង​ផ្អែក​លើ​ដៃ​ទាំង​ពីរ​របស់​ខ្លួន​ឯង រួម​នឹង​ទឹកចិត្ត​តស៊ូ ដើម្បី​មាន​ជីវភាព​ដែល​សមរម្យ។ ជា​ភ័ព្វសំណាង​ល្អ ពួក​គេ​គឺ​ជា​មនុស្ស​ដែល​ស្មោះ​ត្រង់ ហើយ​ចូល​ចិត្ត​ជួយ​យក​អសារ​អ្នក​ដទៃ ហើយ​ពួក​គេ​នឹង​ត្រូវ​អំពើ​ល្អ​ពី​អ្នក​ដទៃ​ទាំង​នោះ តប​ស្នង​ត្រលប់​មកវិញ ដែល​នឹង​ជួយ​ធ្វើ​អោយ​ពួក​គេ​ជោគជ័យ ក្នុង​អាជីព និង​ការងារ។ ពួក​គេ​ក៏​អាច​មាន​លទ្ធភាព ក្លាយ​ទៅ​ជា​អ្នក​មាន​បាន នៅ​ជីវិត​ចុង​ក្រោយ​របស់​ខ្លួន​ដែរ។

១១) ខែ​វិច្ឆិកា

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ នឹង​រស់​នៅ​ជាមួយ​ជីវិត​ដែល​គ្មាន​ទុក្ខកង្វល់ ទាំង​ក្នុង​ក្រុមគ្រួសារ និង​ជីវិត​ការងារ។ ពួក​គេ​គឺ​ជា​មនុស្ស​ឆ្លាត ចិត្តល្អ ស្មោះត្រង់ និង​ទទួល​បាន​ការ​ស្រលាញ់​រាប់​អាន​ច្រើន​ពី​អ្នក​ដទៃ។ លើស​ពី​នេះ​ទៅ​ទៀត ជីវិត​ជារួម​របស់​ពួក​គេ​គឺ​មាន​ក្ដី​សុខ​សុវត្ថិភាព ហើយ​កម្រ​ជួប​នឹង​ឧបសគ្គ ឬ​បញ្ហា​ធ្ងន់​ធ្ងរ​ណាស់។

១២) ខែ​ធ្នូ

បុគ្គលឆ្នាំកុរ​ដែល​កើត​នៅ​ក្នុង​ខែ​នេះ គឺ​មាន​ទាំង​ក្ដី​សុខ ហើយ​និង​ក្ដី​ទុក្ខ​នៅ​ឡូក​ឡំ​គ្នា។ ពួក​គេ​អាច​ទទួល​បាន​កេរ្តិ៍​មរតក​ខ្លះ ពី​ក្នុង​វង្ស​ត្រកូល ប៉ុន្តែ​ទទួល​បាន​ការ​ជួយ​គាំទ្រ តិចតួច​បំផុត​ពី​ឪពុកម្ដាយ ហើយ​និង​អ្នក​ដទៃ។ ដូច្នេះ​ពួក​គេ​ចាំបាច់​ត្រូវ​ពឹងពាក់​លើ​ខ្លួន​ឯង ដើម្បី​មាន​អាជីព​ដែល​ល្អ​ប្រសើរ។

ទោះ​បី​ជា​បែប​ណា នៅ​ពេល​ដែល​ជួប​នឹង​ឧបសគ្គ​មនុស្ស​ក្រុម​នេះ ចូល​ចិត្ត​គិត​ច្រើន ហើយ​វា​ធ្វើ​អោយ​ប៉ះពាល់​ខ្លាំង​ដល់​សុខភាព​របស់​ពួក​គេ ដូច្នេះ​ប្រការ​ល្អ ពួក​គេ​គួរ​តែ​ធ្វើ​លំហាត់​ប្រាណ​អោយ​បាន​ជា​ប្រចាំ។



អត្ថបទថ្មី